Лукашэнка павіншаваў беларусаў з Днём касманаўтыкі

Прэзідэнт Беларусі Аляксандр Лукашэнка павіншаваў суайчыннікаў з Днём касманаўтыкі. Пра гэта паведаміла БЕЛТА, спасылаючыся на прэс-службу кіраўніка дзяржавы.

"Сёння мы адзначаем Дзень касманаўтыкі. 12 красавіка 1961 года для чалавецтва пачалася новая эра ў вывучэнні Сусвету. І з першых крокаў на гэтым шляху айчынныя навукоўцы, інжынеры і канструктары ўносяць значны ўклад у мірнае асваенне космасу. Мы па праве ганарымся нашымі землякамі-касманаўтамі - Пятром Клімуком, Уладзімірам Кавалёнкам, Алегам Навіцкім і першым касманаўтам суверэннай Беларусі Марынай Васілеўскай", - гаворыцца ў віншаванні.

Кіраўнік дзяржавы адзначыў, што ў Беларусі паспяхова рэалізуецца шэраг касмічных праектаў. "Мы ствараем новыя спадарожнікі, самае сучаснае абсталяванне, ажыццяўляем падрыхтоўку ўласных кадраў, што пацвярджае імідж Беларусі як высокатэхналагічнай краіны. Упэўнены, і надалей касмічная галіна будзе паступальна развівацца, з'яўляючыся драйверам нацыянальнай эканомікі", - падкрэсліў Аляксандр Лукашэнка.

Прэзідэнт пажадаў усім моцнага здароўя, шчасця, міру, новых здзяйсненняў на карысць Радзімы.