Лукашэнка павіншаваў кіраўнікоў дзяржаў - членаў Афрыканскага саюза з Днём Афрыкі

Прэзідэнт Беларусі Аляксандр Лукашэнка павіншаваў з Днём Афрыкі Старшыню Афрыканскага саюза, Прэзідэнта Бурундзі Эварыста Ндайішыміе, а таксама ўсіх кіраўнікоў дзяржаў і ўрадаў - членаў аб'яднання, паведамляе БЕЛТА.

"Для кожнага народа на кантыненце гэты дзень мае глыбокі сэнс. Стварэнне Арганізацыі афрыканскага адзінства стала паваротным момантам у сусветнай гісторыі, які азнаменаваў рашучы разрыў з каланіяльным мінулым. Гэта свята назаўжды застанецца сімвалам мужнасці, самаахвярнай барацьбы за права быць гаспадарамі на роднай зямлі, трыумфу ідэі агульнаафрыканскай салідарнасці", - гаворыцца ў віншаванні.

"Беларусь з вялікай павагай ставіцца да гістарычнай спадчыны. Мы бачым, як сёння, абапіраючыся на трывалы фундамент незалежнасці, краіны Афрыкі ўпэўнена трансфармуюцца ў магутны і ўплывовы цэнтр шматпалярнага свету", - дадаў Аляксандр Лукашэнка.

Кіраўнік дзяржавы падкрэсліў, што Беларусь ганарыцца сваім укладам у падтрымку працэсаў дэкаланізацыі Афрыкі і імкнецца паслядоўна развіваць дружалюбныя адносіны з яе дзяржавамі.

"Рэалізаваныя намі праекты з шэрагам афрыканскіх краін па комплекснай механізацыі сельскай гаспадаркі, фарміраванні сэрвісных цэнтраў і навучанні спецыялістаў ужо даказалі эфектыўнасць, забяспечылі рэальны рост ураджайнасці і ўмацаванне эканамічнай самастойнасці нашых партнёраў, - адзначыў ён. - Гатовы да пашырэння супрацоўніцтва таксама ў сферах харчовай бяспекі, энергетыкі, нафтахіміі, аховы здароўя, лічбавых тэхналогій. Упэўнены, названыя аспекты могуць стаць асновай для паглыблення дыялогу паміж Беларуссю і Афрыканскім саюзам.

Беларускі лідар аднавіў запрашэнне дэлегацыі Афрыканскага саюза наведаць Мінск з візітам для разгляду перспектыўных напрамкаў узаемадзеяння. Ён таксама адзначыў, што будзе рады асабістай сустрэчы са Старшынёй аб'яднання для абмеркавання пытанняў актуальнага парадку дня, у тым ліку беларуска-бурундзійскіх адносін.

Прэзідэнт Беларусі пажадаў кіраўнікам дзяржаў і ўрадаў Афрыканскага саюза міру, дабрабыту і ўстойлівага развіцця, а Старшыні аб'яднання - поспехаў на адказнай пасадзе.