Лукашэнка павіншаваў народ Італіі з Днём абвяшчэння Італьянскай Рэспублікі

Прэзідэнт Беларусі Аляксандр Лукашэнка павіншаваў народ Італіі з галоўным дзяржаўным святам - Днём абвяшчэння Італьянскай Рэспублікі. Пра гэта паведаміла БЕЛТА са спасылкай на прэс-службу кіраўніка дзяржавы.

"Для беларусаў Італія - гэта перш за ўсё краіна з унікальнай гісторыяй і непаўторнай культурай, багатай прыродай, адкрытымі і гасціннымі людзьмі, неабыякавымі да чужой бяды", - гаворыцца ў віншаванні.

Кіраўнік дзяржавы адзначыў, што адносіны паміж народамі Беларусі і Італіі з'яўляюцца прыкладам шчырага сяброўства, якое мае трывалы падмурак. "Разам мы здолелі пабудаваць моцныя і шматгранныя сувязі ў розных сферах, - падкрэсліў Прэзідэнт. - Упэўнены, нягледзячы на геаграфічную адлегласць і складаную геапалітычную сітуацыю, мы застанемся добрымі партнёрамі, зацікаўленымі ў падтрыманні і развіцці ўсебаковага супрацоўніцтва".

Аляксандр Лукашэнка пажадаў усім жыхарам Італіі міру, згоды і росквіту.