Лукашэнка правядзе выязны семінар па пытаннях АПК

Выязны семінар-нарада з удзелам Прэзідэнта Беларусі Аляксандра Лукашэнкі пройдзе 17 чэрвеня ў Мінскім раёне, паведамляе БЕЛТА.

Мерапрыемства пройдзе на базе аднаго з малочна-таварных комплексаў філіяла "Астрашыцкі Гарадок" ААТ "Агракамбінат "Дзяржынскі".

Кіраўніку дзяржавы і ўдзельнікам семінара даложаць аб вытворчай дзейнасці ААТ "Агракамбінат "Дзяржынскі" і перадавым вопыце будаўніцтва малочна-таварных комплексаў на прыкладзе МТК "Селішча-2". Размова пойдзе наконт комплекснага падыходу да павышэння захаванасці буйной рагатай жывёлы і забеспячэння росту яе прадукцыйнасці.

Удзельнікі мерапрыемства азнаёмяцца з умовамі ўтрымання малочнай жывёлы на МТК, тэхналогіяй кармлення і даення буйной рагатай жывёлы, сучаснымі спосабамі ўнясення вадкіх арганічных угнаенняў.

Сярод удзельнікаў семінара-нарады - старшыні аблвыканкамаў і іх першыя намеснікі, упаўнаважаныя прадстаўнікі кіраўніка дзяржавы ў рэгіёнах, памочнікі Прэзідэнта - інспектары па абласцях.