Лукашэнка: Упэўнены, "Беларуская чыгунка" ўмацуе пазіцыі і прадоўжыць паступальны рух наперад

Прэзідэнт Беларусі Аляксандр Лукашэнка павіншаваў работнікаў і ветэранаў Беларускай чыгункі з прафесійным святам - Днём чыгуначніка. Аб гэтым паведамляе БЕЛТА са спасылкай на прэс-службу кіраўніка дзяржавы.

"Беларуская чыгунка" - важнейшае звяно ў транспартнай сістэме краіны і гонар яе жыхароў. Штогод вы перавозіце больш за 60 мільёнаў пасажыраў і звыш 100 мільёнаў тон розных грузаў. Усе, хто карыстаецца паслугамі Беларускай чыгункі, абсалютна ўпэўнены ў вашай надзейнасці і пунктуальнасці", - гаворыцца ў віншаванні.

Кіраўнік дзяржавы нагадаў, што слаўныя працоўныя традыцыі беларускіх чыгуначнікаў былі закладзены з адкрыццём першага на тэрыторыі Беларусі ўчастка Парэчча - Гродна. "З таго часу некалькі пакаленняў машыністаў і праваднікоў, дыспетчараў і супрацоўнікаў вакзалаў, пуцявых абходчыкаў і інжынераў-рамонтнікаў з гонарам носяць форму беларускага чыгуначніка і адказна працуюць на карысць сваёй краіны", - адзначыў Аляксандр Лукашэнка.

"Упэўнены, удасканаленне кіравання перавозкамі, развіццё інфраструктуры і тэхналогій, нарошчванне патэнцыялу экспартных транспартных калідораў дазволяць вам і далей умацоўваць свае пазіцыі, прадаўжаць паступальны рух наперад", - падкрэсліў беларускі лідар.

Прэзідэнт пажадаў работнікам галіны, іх родным і блізкім здароўя, шчасця і новых прафесійных поспехаў.