Лукашэнка: За 20 гадоў Прэзідэнцкі спартыўны клуб паспяхова рэалізаваў сотні маштабных праектаў

Прэзідэнт Беларусі Аляксандр Лукашэнка павіншаваў калектыў Прэзідэнцкага спартыўнага клуба з 20-гадовым юбілеем. Аб гэтым паведамляе БЕЛТА са спасылкай на прэс-службу беларускага лідара.

Кіраўнік дзяржавы адзначыў, што гэта аб'яднанне па праву з'яўляецца значнай часткай фізкультурна-спартыўнага руху краіны. "За два дзесяцігоддзі пры вашым непасрэдным удзеле паспяхова рэалізаваны сотні маштабных праектаў, пабудаваны дзясяткі шматфункцыянальных спартыўных пляцовак, - гаворыцца ў віншаванні. - Рэальную падтрымку атрымалі тысячы спартсменаў і трэнераў. Асабліва трэба адзначыць ваш уклад у развіццё дзіцячага спорту і выхаванне падрастаючага пакалення".

Прэзідэнт выказаў упэўненасць, што дзякуючы набытаму вопыту і вялікаму патэнцыялу калектыву аднадумцаў Прэзідэнцкі спартыўны клуб зробіць яшчэ больш для папулярызацыі здаровага ладу жыцця і развіцця фізічнай культуры і спорту ў Беларусі.

"Жадаю моцнага здароўя, міру, дабра вам, вашым родным і блізкім", - дадаў Аляксандр Лукашэнка.