"Патэнцыял значна большы". Лукашэнка аб супрацоўніцтве з Краснаярскім краем

Беларусь і Краснаярскі край Расіі нядрэнна супрацоўнічаюць, але існуючы патэнцыял дазваляе рабіць гэта яшчэ больш эфектыўна. Пра гэта Прэзідэнт Беларусі Аляксандр Лукашэнка заявіў 19 мая на сустрэчы з губернатарам Краснаярскага края Расіі Міхаілам Кацюковым, паведамляе БЕЛТА.

Кіраўнік дзяржавы ў першую чаргу звярнуў увагу на гандлёва-эканамічнае ўзаемадзеянне краіны з расійскім рэгіёнам. "Павінен заўважыць, што мы нядрэнна супрацоўнічаем. Аб гэтым сведчыць рост тавараабароту - у межах 200 млн долараў мы заўсёды знаходзімся, недзе крыху менш, больш", - сказаў Прэзідэнт. Аляксандр Лукашэнка выказаў упэўненасць, што гэты паказчык можна істотна павялічыць з улікам таго значнага патэнцыялу, які маюць абодва бакі.

За перыяд з 2020 года ўзаемны гандаль Беларусі і Краснаярскага края Расіі дасягнуў найбольшых значэнняў у 2022 годзе - амаль 234 млн долараў. У наступным, 2023 годзе аб'ём двухбаковага тавараабароту крыху знізіўся, але ў 2024 годзе зноў вырас, перасягнуўшы 221 млн доллараў. Пры гэтым беларускі экспарт за абазначаны перыяд паступова ўзрастаў і па выніках мінулага года склаў 141,5 млн долараў, што на 20 % перавышае паказчыкі 2023-га.

У расійскі рэгіён пастаўляюцца ў асноўным спецыфічныя тавары, аўтамабілі спецыяльнага прызначэння, злучэнні, якія змяшчаюць функцыянальную нітрыльную групу, электрычныя трансфарматары, часткі і прылады для аўтамабіляў і трактароў, бытавыя і іншыя электранагравальныя прыборы, электрапліты.