Прэзідэнт Беларусі дасць інтэрв'ю міждзяржаўнай тэлерадыёкампаніі "Мір"

Прэзідэнт Беларусі Аляксандр Лукашэнка 8 красавіка дасць інтэрв'ю міждзяржаўнай тэлерадыёкампаніі "Мір", паведамляе БЕЛТА.

У якасці інтэрв'юера выступіць старшыня МТРК "Мір" Радзік Батыршын. На гэтай пасадзе ён працуе з 2007 года. Батыршын прымаў удзел у шэрагу буйных тэлевізійных праектаў, выступаў у якасці аўтара і арганізатара грамадска значных інфармацыйных мерапрыемстваў, сярод якіх міжнародны тэлемарафон "Наша Перамога", прысвечаны 65-годдзю Перамогі ў Вялікай Айчыннай вайне, і праект "Вахта памяці" да 70-й гадавіны пачатку Вялікай Айчыннай вайны.

Міждзяржаўная тэлерадыёкампанія "Мір" была створана рашэннем кіраўнікоў дзяржаў СНД 9 кастрычніка 1992 года з мэтай захавання агульнай інфармацыйнай прасторы і садзейнічання міжнароднаму абмену інфармацыяй у СНД. Нацыянальныя філіялы і прадстаўніцтвы арганізацыі працуюць у дзевяці краінах.

У склад МТРК "Мір" уваходзяць тэлеканалы "Мір", Мір 24", радыёстанцыя "Мір", інфармацыйна-аналітычны партал "MIR24.TV" і шматфункцыянальная спадарожнікавая сістэма "Мір-Тэлепорт". Агульны ахоп аўдыторыі тэлеканала Мір" - больш чым 180 млн чалавек, "Мір 24" - 80 млн чалавек.

Аснову вяшчання складаюць інфармацыйна-аналітычныя праграмы, у якіх асвятляюцца ключавыя падзеі краін СНД і свету, а таксама пазнавальныя, забаўныя і публіцыстычныя праграмы, дакументальныя стужкі ўласнай вытворчасці. Значная частка эфіру адведзена мастацкім фільмам і серыялам.