Прэзідэнт Беларусі наведае дрэваперапрацоўчы комплекс "Ляскавічы"

Прэзідэнт Беларусі Аляксандр Лукашэнка азнаёміцца з вытворчасцю і выкарыстаннем драўняных паліўных гранул (пелет) у Петрыкаўскім раёне Гомельскай вобласці, паведамляе БЕЛТА.

Кіраўнік дзяржавы наведае дрэваперапрацоўчы комплекс "Ляскавічы" Нацыянальнага парку "Прыпяцкі", дзе яму даложаць аб рабоце ў гэтым напрамку. Аляксандр Лукашэнка азнаёміцца з мадэрнізацыяй лесапільнага цэха і выкарыстаннем пелет на практыцы. Прэзідэнту прадэманструюць узоры кацельнага абсталявання айчыннай вытворчасці, якое працуе на пелетах.

Чакаецца, што ў цэнтры ўвагі Прэзідэнта будуць і іншыя пытанні рэгіянальнага развіцця на Палессі.

Аб планах азнаёміцца са станам спраў у гэтай сферы і выкананнем раней дадзеных даручэнняў Прэзідэнт сказаў 23 мая падчас наведвання Любанскага раёна Мінскай вобласці. Выкарыстанне мясцовай паліўнай сыравіны і, у прыватнасці, вытворчасць пелет з драўняных адходаў - гэта адзін з такіх напрамкаў, развіваць які Аляксандр Лукашэнка даручаў яшчэ некалькі гадоў таму.

Сусветнае спажыванне пелет складае каля 31 млн т за год.