Прэзідэнт Беларусі падпісаў указ аб стварэнні Апеляцыйнага эканамічнага суда

Прэзідэнт Беларусі Аляксандр Лукашэнка 3 красавіка падпісаў указ № 141 аб стварэнні Апеляцыйнага эканамічнага суда. Пра гэта паведамляе БЕЛТА.

Гэта рашэнне прынята кіраўніком дзяржавы дзеля рэалізацыі палажэнняў Кодэкса грамадзянскага судаводства, якім прадугледжваецца стварэнне трохзвёнавай сістэмы эканамічных судоў.

Такое структурнае пераўтварэнне адбудзецца за кошт падзелу дзейнасці судоў першай і апеляцыйнай інстанцый, якія зараз функцыянуюць у рамках аднаго суда. Гэта стане важным крокам у кірунку павышэння эфектыўнасці адпраўлення правасуддзя па эканамічных справах.

Апеляцыйны эканамічны суд у статусе працэсуальнага органа пачне сваю працу з 1 студзеня 2026 года, г.з. з даты ўступлення ў сілу Кодэкса грамадзянскага судаводства.

Суд плануецца сфарміраваць за кошт наяўнай колькасці суддзяў і работнікаў апаратаў іншых судоў. Усяго ў ім будуць працаваць 27 суддзяў, уключаючы старшыню і яго намеснікаў.

Вярхоўнаму Суду даручана ўнесці прапановы па кандыдатурах на кіруючыя і судзейскія пасады, а таксама вырашыць усе неабходныя арганізацыйныя пытанні, накіраваныя на забеспячэнне дзейнасці новага судовага органа.