Прэзідэнт Беларусі павіншаваў з Днём пагранічніка

Прэзідэнт Беларусі Аляксандр Лукашэнка павіншаваў камандаванне, асабовы склад і ветэранаў органаў пагранічнай службы з прафесійным святам - Днём пагранічніка. Пра гэта паведамляе БЕЛТА.

"Вы стаіце на варце межаў Радзімы, гатовыя ў любую хвіліну першымі прыняць на сябе ўдар ворага. Гэта выбар моцных духам і смелых воінаў - сапраўдных патрыётаў, - гаворыцца ў віншаванні. - Кожны з вас працягвае слаўны шлях герояў пагранічнікаў, якія далі рашучы адпор фашысцкім захопнікам у гады Вялікай Айчыннай вайны, герояў, якія здзейснілі подзвігі ў мірны час".

Кіраўнік дзяржавы адзначыў, што на мяжы зараз неспакойна і абарона Айчыны ў перыяд глабальнай геапалітычнай нестабільнасці патрабуе максімальнай засяроджанасці на пагрозах і мерах па гарантаванні бяспекі. "Мы ўзводзім новыя пагранічныя рубяжы, абсталяваныя сучаснымі тэхнічнымі сродкамі аховы, аснашчаем пагранічную службу найноўшымі ўзорамі ўзбраення і баявой тэхнікі, робім усё, каб захаваць чыстае неба над роднай Беларуссю, - падкрэсліў Прэзідэнт. - Абсалютна перакананы, што мірны сон нашых грамадзян ахоўваюць прафесіяналы найвысокага ўзроўню, верныя абавязку і адданыя сваёй краіне".

Аляксандр Лукашэнка падзякаваў за службу ветэранам, дзеючым вайскоўцам і цывільнаму персаналу, а таксама пажадаў ім і іх сем'ям моцнага здароўя, шчасця і дабрабыту.