Валерый Вакульчык стаў кіраўніком Апарату Савета Міністраў

Прэзідэнт Беларусі Аляксандр Лукашэнка прызначыў Валерыя Вакульчыка кіраўніком Апарату Савета Міністраў, інфармуе БЕЛТА.

Да гэтага часу Валерый Вакульчык працаваў на пасадзе памочніка Прэзідэнта - інспектара па Брэсцкай вобласці.

"Што датычыцца кіраўніка Апарату ўрада, у нас заўсёды там быў чалавек ваенны, падрыхтаваны, чалавек вопытны. Гэта пасада міністра. Прытым вельмі сур'ёзная - трэба арганізаваць работу Апарату ўрада. Гэта вельмі сур'ёзная пасада. З Наталляй Уладзіміраўнай (Пяткевіч, якая назначана віцэ-прэм'ерам пасля работы на пасадзе першага намесніка кіраўніка Адміністрацыі Прэзідэнта) вы там знойдзеце агульную мову. Як людзі сістэмныя і патрабавальныя, думаю, будзеце дарэчы цяперашняму ўраду. Прынамсі, Аляксандр Генрыхавіч (прэм'ер-міністр Аляксандр Турчын) па вас не меў ніякіх пярэчанняў. Нават задаволены быў", - сказаў Прэзідэнт.

Вакульчык Валерый Паўлавіч нарадзіўся ў 1964 годзе ў вёсцы Заверша Драгічынскага раёна Брэсцкай вобласці. У 1985 годзе скончыў Харкаўскае гвардзейскае вышэйшае танкавае каманднае вучылішча. У 2011 годзе - Акадэмію кіравання пры Прэзідэнце Рэспублікі Беларусь.

З 1985 па 1991 год праходзіў ваенную службу ва Узброеных Сілах СССР.

У 1991-2008 гадах служыў у органах дзяржаўнай бяспекі Беларусі.

2008-2011 гады - начальнік Аператыўна-аналітычнага цэнтра пры Прэзідэнце Беларусі.

2011-2012 гады - старшыня Следчага камітэта.

З 2012 па 2020 год узначальваў Камітэт дзяржаўнай бяспекі.

З верасня па кастрычнік 2020 года - дзяржаўны сакратар Савета бяспекі.

У 2020 годзе назначаны памочнікам Прэзідэнта Беларусі - інспектарам па Брэсцкай вобласці.

З мая 2025 года - кіраўнік Апарату Савета Міністраў.