У Смалявіцкім раёне маленькае дзіця выпала з акна кватэры на пятым паверсе

Пяцігадовы хлопчык выпаў з акна пяціпавярхоўкі ў Смалявіцкім раёне. Пра гэта паведамляе БЕЛТА, спасылаючыся на Следчы камітэт.

Паводле звестак следства, 10 мая ў вёсцы Зарэчча Смалявіцкага раёна пяцігадовы хлопчык выпаў з акна кватэры, размешчанай на пятым паверсе. Дзіця з цяжкімі траўмамі дастаўлена ў бальніцу. Урачы змагаюцца за яго жыццё. Следчыя высветлілі, што ў той дзень малы знаходзіўся пад наглядам бабулі. Паводле папярэдніх звестак, жанчына выйшла з кватэры на некалькі хвілін, пакінуўшы ўнука аднаго.

Вядома, што бацькі дзіцяці не займаюцца яго выхаваннем і злоўжываюць спіртнымі напоямі. З трохмесячнага ўзросту за хлопчыкам прыглядвае бабуля.

Смалявіцкі раённы аддзел Следчага камітэта праводзіць праверку па гэтым факце. Следчыя высвятляюць усе акалічнасці здарэння, а таксама прычыны і ўмовы, што прывялі да траўміравання дзіцяці.