Навучэнцы Дзіцячага тэхнапарка прапанавалі на суд журы каля ста праектаў для розных сфер эканомікі

Навучэнцы Нацыянальнага дзіцячага тэхнапарка распрацавалі і перадалі для прамысловых прадпрыемстваў Беларусі больш за 80 інавацый. Яны могуць выкарыстоўвацца ў такіх сферах, як машынабудаванне, біяхімія, электроніка.

Лістападаўская адукацыйная змена ў тэхнапарку завяршылася. 21 лістапада 150 старшакласнікаў, якія прайшлі праграмы навучання, прапанавалі свае праекты для абароны.

Нацыянальны дзіцячы тэхнапарк - адна з самых актыўных і, можна сказаць, прагрэсіўных адукацыйных пляцовак Беларусі. Штогод тут праходзяць навучанне больш за 1,5 тыс. старшакласнікаў з усёй краіны па 15-ці сучасных напрамках.

Усяго на гэты раз было прапанавана каля сотні праектаў. Сферы разнастайныя - ад біятэхналогій і робататэхнікі да архітэктуры, дызайну і энергетыкі будучыні. Усё гэта дэманструе высокі ўзровень падрыхтоўкі і крэатыўнасці навучэнцаў.

"Сутнасць праекта - стварыць экскурсійны варыянт канвеернага працэсу МАЗа для саміх работнікаў, якія не ведаюць, што такое канвеер, а таксама для замежных турыстаў, таму што цікавасць да нашай краіны расце з кожным годам. У віртуальнай рэальнасці можна шмат чаго зрабіць, у далейшым гэта будзе вельмі перспектыўнае развіццё тэхналогій", - расказала пра сваю работу вучаніца гімназіі № 2 г. Бабруйска Ксенія Болбас.

Такія прэзентацыі наладжваюць сувязь паміж творчай моладдзю і рэальным сектарам эканомікі краіны. Плюс гэта добрая магчымасць наладзіць кантакты з прадстаўнікамі прадпрыемстваў. Дарэчы, яны таксама ў журы. Сярод бонусаў і магчымасць паступіць па рэкамендацыі назіральнага савета дзіцячага тэхнапарка ва ўніверсітэты па 270-ці спецыяльнасцях.

Зараз працягваецца прыём заявак на адукацыйную змену ў сакавіку 2025 года.

Удзельнічаць у конкурсным адборы могуць навучэнцы 9-11 класаў. Падаць заяўку трэба да 2 снежня.

Фота БЕЛТА