"Хезбала" атакавала беспілотнікам ваенную базу ля Біньяміна

"Хезбала" нанесла ўдар беспілотнікам па ваеннай базе ля сяла Біньяміна. Паводле афіцыйнай інфармацыі, загінулі чатыры салдаты, яшчэ сем - атрымалі сур'ёзныя раненні.

Па іншых звестках, колькасць пацярпелых перавышае сотню, аднак у арміі Ізраіля заклікалі не публікаваць інфармацыю аб ахвярах.

Тым часам Тэль-Авіў працягвае пашырэнне аперацыі супраць Бейрута. Міратворцы ААН паведамляюць, што тры ізраільскія вайсковыя падраздзяленні ўвайшлі на тэрыторыю Лівана. У місіі таксама адзначылі: два танкі Ізраіля ўварваліся на пазіцыі міратворцаў, пашкодзіўшы інфраструктуру, а напярэдадні байцы ЦАХАЛа заблакавалі правядзенне крытычна важнай лагістычнай аперацыі.

На фоне боязі далейшай эскалацыі ЗША вырашылі перадаць Ізраілю сістэму проціпаветранай абароны для ўмацавання бяспекі ў выпадку атакі Ірана. Паводле даных амерыканскіх СМІ, адміністрацыя Байдэна таксама адправіць у Ізраіль каля сотні амерыканскіх вайскоўцаў, якія дапамогуць з эксплуатацыяй СПА.