Кошт газу ў Еўропе дасягнуў максімуму з кастрычніка 2023 года

Ва ўмовах спынення транзіту расійскага газу праз Украіну цэны на блакітнае паліва ў Еўропе працягваюць расці.

Паводле звестак агенцтва Блумберг, яны дасягнулі 51 еўра за мегават-гадзіну, што з'яўляецца самым высокім паказчыкам з кастрычніка 2023 года. Акрамя таго, запасы па ўсім кантыненце скарачаюцца самымі хуткімі тэмпамі з 2021-га. Згодна са звесткамі экспертаў, на канец 2024 года іх узровень у газасховішчах Еўропы знізіўся на 25 % у параўнанні з пікавымі значэннямі. Пакуль дэфіцыту няма, але краіны ЕС сутыкнуцца з цяжкасцямі пры папаўненні запасаў к наступнаму абагравальнаму сезону.

Зараз расійскі газ у Еўропу пастаўляецца толькі па адным маршруце - праз Турцыю. Для краін, якія не маюць доступу да мора, звадкаваны прыродны газ застаецца дарагім варыянтам з-за высокіх выдаткаў на транспарціроўку, рэгазіфікацыю і далейшы транзіт. Акрамя таго, у летнія месяцы Еўропе прыйдзецца канкурыраваць за звадкаваны прыродны газ з азіяцкімі краінамі.