Меркель параіла ўлічваць інтарэсы Расіі, Стармер заклікае ўзмацняць націск на РФ

Захад у пытанні ўкраінскага ўрэгулявання павінен улічваць інтарэсы Расіі. Такую параду сённяшнім палітыкам ЗША і ЕС дала экс-канцлер ФРГ Ангела Меркель. Паводле яе слоў, ігнараванне пазіцыі Масквы можа толькі пагоршыць напружанасць і ўскладніць пошук дыпламатычных рашэнняў. Пры гэтым Меркель падкрэсліла, што Еўрасаюз ідзе на значныя рызыкі дзеля падтрымкі Кіева.

А брытанскі прэм'ер Стармер заявіў, што рэакцыя Расіі на прапанову аб 30-дзённым спыненні агню была недастаткова пераканаўчай. Таму палітык заклікае краіны ЕС прадоўжыць націск на Маскву.

Стармер таксама аб'явіў, што планы па размяшчэнні еўрапейскіх міратворцаў ва Украіне "пераходзяць у аператыўную фазу". У прыватнасці, абмяркоўваюцца дэталі адпраўкі войскаў.

Раней ён выказваў сумненні ў тым, што прыпыненне баявых дзеянняў ва Украіне можа гарантаваць дасягненне міру.