Мінабароны Ізраіля прыгразіў поўным знішчэннем Газы, калі палесцінцы не выканаюць умовы

Міністр абароны Ізраіля Ісраэль Кац прыгразіў поўным знішчэннем Газы, калі палесцінцы не вызваляць заложнікаў і не выганяць ХАМАС.

ЦАХАЛ ужо заявіў аб аднаўленні наземных аперацый у сектары Газа і вяртанні пад свой кантроль калідора Нецарым у цэнтры анклава.

Раней прэм'ер-міністр Ізраіля Біньямін Нетаньяху заявіў, што яго ўрад аднавіў інтэнсіўную барацьбу з палесцінскай групоўкай пасля некалькіх тыдняў беспаспяховых спробаў вызваліць больш заложнікаў. Па словах палітыка, ХАМАС адхіліў некалькі прапаноў аб вяртанні 59 заложнікаў, 24 з якіх, па ўсёй бачнасці, яшчэ жывыя, у абмен на прадаўжэнне тэрміна спынення агню, які мінуў 1 сакавіка.

Нагадаем, ізраільская авіяцыя нанесла масіраваныя ўдары па інфраструктуры ХАМАС у ноч на 18 сакавіка. Па даных палесцінскага боку, загінулі каля 400 мірных жыхароў. Нетаньяху паабяцаў, што зараз Ізраіль будзе толькі нарошчваць сілавыя аперацыі.