МЗС Расіі: Лаўроў і Рубіа пацвердзілі настрой на пошук мірных развязак канфліктных сітуацый

У Малайзіі на палях мерапрыемстваў па лініі АСЕАН адбылася сустрэча міністра замежных спраў Расіі Сяргея Лаўрова з дзяржсакратаром ЗША Марка Рубіа.

Перамовы доўжыліся амаль гадзіну. Бакі пацвердзілі настрой на пошук мірных развязак канфліктных сітуацый, паведамілі ў МЗС Расіі. І дадалі, што аднаўленню расійска-амерыканскага эканамічнага і гуманітарнага супрацоўніцтва магло б спрыяць аднаўленне прамых авіязносін.

У сваю чаргу Рубіа заявіў, што яго размова з Лаўровым была шчырай. І дадаў, што абмеркаваў з ім некаторыя ідэі таго, як можа выглядаць дарожная карта завяршэння ўкраінскага канфлікту.

Нагадаем, першая асабістая сустрэча Лаўрова і Рубіа прайшла ў рамках расійска-амерыканскіх кансультацый у Эр-Рыядзе ў лютым. Яны таксама правялі некалькі тэлефонных размоў, а 4 ліпеня расійскі міністр накіраваў амерыканскаму калегу віншавальную тэлеграму з нагоды Дня незалежнасці ЗША.