У НАТА заклікалі павялічыць абаронны бюджэт, інакш прыйдзецца вучыць рускую мову

ЕС неабходна перагледзець прыярытэты ў расходах для павелічэння абаронных бюджэтаў. Пра гэта, выступаючы ў Еўрапарламенце, заявіў генеральны сакратар НАТА Марк Рутэ.

Ён папярэдзіў, што выніковая мэта альянсу можа скласці да 3,7 % ад ВУП, калі краіны не наладзяць сумесныя закупкі ўзбраенняў. Але іншага выйсця, па яго словах, няма.

"Тых 2 %, на якіх мы зараз знаходзімся, відавочна недастаткова. Зараз мы ў бяспецы, але не праз 4-5 гадоў. Так што, калі вы гэтага не зробіце, то ідзіце на курсы рускай мовы або едзьце ў Новую Зеландыю. Павялічыць траты - гэта менавіта тое пытанне, якое мы павінны вырашыць на працягу наступных месяцаў, каб заставацца ў бяспецы ў гэтай частцы свету і абараніць сябе", - лічыць Рутэ.

Большасць краін ЕС з'яўляецца членамі НАТА, і за апошнія 10 гадоў альянс настойваў на тым, каб яны трацілі на абарону не менш чым 2 % ад ВУП. Аднак зараз толькі 24 з 32 краін НАТА выконваюць гэтую рэкамендацыю.