20 гадоў на варце здароўя. РНПЦ "Маці і дзіця" прымаюць віншаванні

Медыкі РНПЦ "Маці і дзіця" прымаюць віншаванні! 11 кастрычніка сталічнаму цэнтру 20 гадоў.

Яны на варце матчынага здароўя, выходжваюць малых з анамальна нізкай масай цела, дапамагаюць парам, якія страцілі ўсялякія надзеі стаць бацькамі.

Гэта ўнікальная медыцынская ўстанова. Тут працуюць з самымі няпростымі выпадкамі - цяжкімі паталогіямі цяжарнасці, карэкцыяй парокаў плода, заўчаснымі родамі і наступнай дапамогай неданошаным малым.

Урачы кожны дзень даказваюць сваім пацыентам, што немагчымае магчыма! Штодня тут нараджаюцца дзеці ў мам, якія яшчэ 10 гадоў таму не маглі б зацяжарыць і вынасіць здаровых малых.

Толькі дзякуючы ЭКА на святло з'явіліся больш як 10 тысяч маленькіх беларусаў. А дзякуючы перадавым тэхналогіям меддапамогі і высакакласным спецыялістам нашы медыкі ратуюць жыцці нават у самых цяжкіх выпадках. Дзіцячая смяротнасць у Беларусі застаецца адной з самых нізкіх у свеце. Што ўцешна, такая дапамога даступная ўсім мамам і іх малым.

У 2024 годзе РНПЦ "Маці і дзіця" адзначаны прэміяй кіраўніка дзяржавы "За духоўнае адраджэнне". Тым самым прызнаны асаблівы ўклад цэнтра не толькі ў даступнасць медыцынскай дапамогі, але і папулярызацыю сямейных каштоўнасцяў.