Упершыню ў Беларусі паспяхова праведзена інавацыйная тэрапія пацыенту з ракам крыві

У Беларусі здзейснілі прарыў у медыцыне. Упершыню ў краіне паспяхова праведзена ўнікальная аперацыя з выкарыстаннем CAR-T-тэрапіі пацыенту з ракам крыві. Над інавацыяй працавалі тры медыцынскія навуковыя цэнтры.

На базе МНПЦ хірургіі, транспланталогіі і гематалогіі зусім нядаўна беларускія медыкі правялі ўнікальную аперацыю пацыенту і ўкаранілі інавацыйны метад лячэння раку - CAR-T-клетачную тэрапію. І гэта сапраўды прарыў! Бо анкалогія - дыягназ, які палохае кожнага. Але калі 30 гадоў таму гэта быў амаль прыгавор, і ўрачы маглі дапамагчы толькі 20 % пацыентаў, то сёння дзякуючы новым тэхналогіям вылечваюцца ўжо каля 60 % анкахворых. І CAR-T-клетачная тэрапія - адзін з самых перспектыўных і эфектыўных метадаў лячэння раку на сённяшні дзень.