Чацвёрты дзень XXXII Мінскай міжнароднай кніжнай выставы-кірмашу прысвечаны Беларусі

Форум літаратараў і выдаўцоў, пісьменнікаў і чытачоў стартаваў з урачыстай цырымоніі ў гонар Дня Канстытуцыі Рэспублікі Беларусь.

На сцэне выставачнага комплексу "БелЭкспа" лепшым юнакам і дзяўчатам з усіх рэгіёнаў краіны былі ўручаны пашпарты. Маладыя людзі таксама атрымалі ў падарунак альбом "Я - грамадзянін Беларусі" і экзэмпляр Канстытуцыі.

Урачыстую атмасферу сённяшняга дня падтрымала і падвядзенне вынікаў 64-га нацыянальнага конкурсу "Мастацтва кнігі", на які было пададзена 10 тыс. заявак. Сёння на сцэну выйшлі пераможцы ў дзясятках намінацый. Усе яны атрымалі статуэтку "Залаты фаліянт" і спецыяльны дыплом.

Гран-пры конкурсу ў маштабнага выдання "Нацыянальны атлас Беларусі" (РУП "Белкартаграфія").

Многія пераможцы конкурсу прэзентавалі свае кнігі.

Дзень Беларусі ў рамках Мінскага кніжнага кірмашу стаў пляцоўкай для знаёмстваў чытачоў са стваральнікамі нацыянальнай літаратуры самых розных жанраў.

Кніжны кірмаш - месца жывых сустрэч. У нядзелю, 16 сакавіка, Мінскі міжнародны кніжны форум прадоўжыць сваю работу. Выстава будзе прысвечана Арменіі.