"Майскі вальс" распачаў вялікі фестывальны тыдзень у Маладзечне

У Маладзечне стартаваў XXIV Нацыянальны фестываль беларускай песні і паэзіі. І хаця ўрачыстае адкрыццё форуму і традыцыйны конкурс маладых выканаўцаў эстраднай песні адбудзуцца ў пятніцу, 13 чэрвеня, у горадзе ўжо распачаліся святочныя мерапрыемствы з удзелам аматараў роднага слова і айчынных кампазітараў.

Адкрыў форум абласны фестываль духавой музыкі "Майскі вальс".

Традыцыйны, любімы беларусамі Маладзечанскі форум распачаўся па-музычнаму бравурна! 15 духавых аркестраў, каля тысячы выканаўцаў сабраліся ў адзін момант у адным месцы на Цэнтральнай плошчы Маладзечна, каб даць нацыянальнаму святу беларускай песні і паэзіі яркі, маштабны інструментальны старт.

Гэта абласны фестываль духавой музыкі "Майскі вальс". Здавалася б, больш дакладна было сказаць "Чэрвеньскі вальс", але ў назве форуму не месяц года, а знакаміты шлягер Ігара Лучанка і Міхаіла Ясеня, прысвечаны Вялікай Айчыннай вайне, Вялікай Перамозе. Твор стаў своеасаблівым гімнам фестывалю!

"Майскі вальс" задаў і рэпертуарную тэматыку форума - кожны з удзельнікаў свята прапанаваў патрыятычныя творы. На канцэрце можна было пачуць і сусветную класіку, і мелодыі савецкіх часоў. Асаблівы акцэнт праграмы на айчыннай музыцы - ва ўнісон ідэі Нацыянальнага фестывалю беларускай песні і паэзіі.

"Майскі вальс" - форум, якому больш за 40 гадоў! Гэта праект, які "падарожнічае" па розных гарадах Беларусі. У Маладзечне - другі раз.

Гэта толькі пачатак. Да ўрачыстага адкрыцця фестывалю, якое адбудзецца 13 чэрвеня, увесь горад будзе жыць самымі рознымі мерапрыемствамі, бо багатая праграма: літаратурныя сустрэчы і прэзентацыі, пленэры і выставы, тэатральныя сустрэчы драматычнага тэатра, батлейкі. Адным словам, Маладзечна ўвесь тыдзень фестывальны.