Лукашэнка ўказаў на недахопы ў навядзенні парадку

Прэзідэнт Беларусі Аляксандр Лукашэнка ўказаў на недахопы ў навядзенні парадку і добраўпарадкавання. Адпаведныя заявы ён зрабіў на нарадзе па пытаннях абыходжання з адходамі і выкарыстання другасных матэрыяльных рэсурсаў, паведамляе БЕЛТА.

Прэзідэнт пацікавіўся, якія прапановы ёсць ва ўрада па мерах адказнасці за аб'ектыўныя парушэнні правіл добраўпарадкавання і парадку на зямлі. "Для грамадзян гэта, напрыклад, няскошаныя ўчасткі, агароджа, якая завалілася, смецце на прысядзібнай тэрыторыі і таму падобнае, - сказаў Аляксандр Лукашэнка. - Вось я аб'ехаў у суботу ўсе вёскі поўначы нашага Мінскага раёна. Сеў і паехаў. Гляджу палі, гляджу, як вы там гаспадарыце. Бардак поўны. Прашу вас мець гэта на ўвазе. Размова будзе жорсткай".

Што датычыцца добраўпарадкавання, Аляксандр Лукашэнка даў дакладныя і прадметныя ўказанні. Калі размова пра адзінокага пенсіянера, інваліда - мясцовыя органы ўлады павінны дапамагчы, а сельскі савет гэта павінен арганізаваць. А калі ёсць здаровыя дзеці, унукі і гэтак далей, то гэта павінна быць ужо іх сферай адказнасці. "Не - рублём прымушайце", - падкрэсліў беларускі лідар.

Па яго словах, аналагічна павінна быць і на тэрыторыі прадпрыемстваў: "Можа быць бедна, але чыста. Гэта не мной прыдумана. Гэта традыцыі элементарнага парадку ва ўсім, якія склаліся за шмат гадоў. Як гаварыў класік, "разруха не ў клазетах, а ў галовах".