Сусветны жаночы хакейны ўік-энд прайшоў на "Мінск-Арэне"

Косы з-пад шлемаў, бліскучыя вочы за візорамі і збянтэжаныя ўсмешкі. Такія хакеісткі замест мускулістых малайцоў з мінскага "Дынама" 18 кастрычніка разразалі лёд на "Мінск-Арэне".

У Беларусі напярэдадні правялі Сусветны жаночы хакейны ўік-энд. Сутнасць падзеі простая - папулярызацыя дысцыпліны ў краіне.

Каля 80 дзяўчынак сабраліся разам на галоўнай пляцоўцы Мінска і патрэніраваліся пад кіраўніцтвам спецыялістаў, а таксама "зуброў". Прычым прыехалі дзяўчынкі і іх бацькі ў тым ліку з рэгіёнаў. Хтосьці з малых зараз толькі робіць першыя крокі ў гэтым відзе спорту, хтосьці наогул упершыню прымерыў канькі.

Але сярэдні ўзрост гэтых гульцоў складае 6-8 гадоў - гэта той самы час, калі мамам і татам варта аддаваць дзіця ў прафесійныя школы і секцыі. Дарэчы, на цяперашні набор усё яшчэ можна паспець.

Лёд падзялілі на некалькі "станцый": для пачаткоўцаў і больш вопытных. На адной пляцоўцы вучылі катацца, на другіх дзеці выконвалі пэўныя заданні.

Пасля заканчэння трэніроўкі на лёдзе ўсіх удзельніц чакала экскурсія па "Мінск-Арэне". Дзяўчаты наведалі "дынамаўскую" зону - трэнажорную і гульнявую залы, раздзявалку "зуброў". Пасля паглядзелі мультфільм пра хакей.

Такія падзеі прайшлі таксама і ў клубах Экстралігі па ўсёй Беларусі.