Дзярждэпартамент ЗША адмяніў 139 замежных грантаў, у тым ліку для беларускай апазіцыі

Дзярждэпартамент ЗША адмяніў фінансаванне праектаў замежнай дапамогі ў розных краінах, у тым ліку для беларускай апазіцыі. Пра гэта ў сацсетцы X паведаміў дэпартамент па павышэнні эфектыўнасці работы ўрада (DOGE), піша БЕЛТА.

Адзначаецца, што дзяржсакратар ЗША Марка Рубіа адмяніў выдзяленне замежным дзяржавам 139 грантаў на агульную суму 215 млн долараў. "Дзяржсакратар Рубіа працягвае дбайна вывучаць замежную дапамогу Дзярждэпартамента, адмяніўшы сёння 139 бескарысных грантаў агульным аб'ёмам 215 млн долараў", - гаворыцца ў паведамленні ведамства.

У прыватнасці, фінансавання на суму 2,4 млн долараў пазбавіўся праект беларускай апазіцыі.

Таксама пад скарачэнне трапілі гранты на праекты ў Вялікабрытаніі, Узбекістане, Малдове, Кыргызстане, Арменіі, Балгарыі, Бразіліі, Ліване, Шры-Ланцы, Лівіі, Маўрытаніі і Тунісе.

Адразу пасля прыходу да ўлады прэзідэнта ЗША Дональда Трампа DOGE пачаў маштабную праверку дзяржаўных выдаткаў. Паводле звестак выдання The Washington Post, адміністрацыя Трампа плануе скараціць бюджэт Дзярждэпартамента амаль удвая. Акрамя таго, была часова спынена дзейнасць Агенцтва ЗША па міжнародным развіцці (USAID) з мэтай яго далейшай рэарганізацыі. Аб'ём сродкаў, што выдзяляюцца міжнародным арганізацыям, паводле звестак выдання, плануецца скараціць амаль на 90 %.