У М'янме аб'яўлена тыднёвая нацыянальная жалоба з-за разбуральнага землетрасення

Прэм'ер-міністр М'янмы Мін Аун Хлайн аб'явіў тыднёвую нацыянальную жалобу ў сувязі з гібеллю больш чым 1,7 тыс. чалавек у выніку землетрасення. Аб гэтым паведамляе БЕЛТА са спасылкай на тэлеканал MRTV.

"У сувязі з чалавечымі ахвярамі дні з 31 сакавіка і па 6 красавіка аб'яўлены жалобнымі на нацыянальным узроўні. У гэтыя дні нацыянальны флаг павінен быць прыспушчаны", - гаворыцца ў распараджэнні Мін Аун Хлайна.

Дзіцячы фонд ААН (ЮНІСЕФ) заявіў, што мільёны дзяцей знаходзяцца ў небяспецы пасля разбуральнага землетрасення, пагоршыўшы і без таго цяжкую гуманітарную сітуацыю, паведамляе ТАСС. Арганізацыя звярнулася да міжнароднай супольнасці "адрэагаваць неадкладна, каб падтрымаць намаганні па выратаванні жыццяў дзяцей і сем'яў". Таксама фонд заклікаў да тэрміновага фінансавання для пашырэння прадастаўлення жыццёва важнай падтрымкі дзецям і сем'ям, якія пацярпелі ад землетрасення, уключаючы чыстую ваду, медыцынскую дапамогу, абарону, псіхасацыяльную падтрымку і адукацыю ў надзвычайных умовах.

У фондзе нагадалі, што яшчэ да землетрасення ў М'янме "больш за 6,5 млн дзяцей мелі патрэбу ў дапамозе". Праграмы міжнароднага гуманітарнага рэагавання застаюцца "крытычна недафінансаванымі". Паводле даных фонду, на сённяшні дзень атрымана меней за 10 % ад запрошаных у сусветнай супольнасці сродкаў на патрэбы дзяцей у 2025 годзе.

Магутнае землетрасенне адбылося 28 сакавіка на тэрыторыі М'янмы. Па розных звестках, яго магнітуда склала ад 7,7 да 7,9. За ім рушыла ўслед паўторнае землетрасенне магнітудай 6,4. Ад стыхіі таксама пацярпеў Тайланд, падземныя штуршкі адчуваліся ў Кітаі і ў В'етнаме. У выніку землетрасення ў М'янме загінулі больш за 1,7 тыс. чалавек, пацярпелі 3,4 тыс. і яшчэ 300 лічацца прапаўшымі без весткі, таксама атрымалі пашкоджанні жылыя будынкі і інфраструктура. Лік загінуўшых у Бангкоку дасягнуў 18.