ЗША дзеліць украінскія нетры. Кіеў прызнаў доўг за ваенную амерыканскую дапамогу

Кіеў і Вашынгтон зацвердзілі мемарандум аб распрацоўцы ўкраінскіх нетраў наогул і рэдказямельных элементаў у прыватнасці, дакумент падпісалі анлайн.

Як паведамілі ў Белым доме, афіцыйны дагавор на гэты конт будзе складзены бакамі ўжо на будучым тыдні, магчыма, 24 красавіка. Змест пагаднення ў падрабязнасцях пакуль не вядомы.

З уцечак вядома, што ЗША становяцца фактычнымі распарадчыкамі ўкраінскага прыроднага набытку, хоць канстытуцыя і аб'яўляе ўкраінскі народ выключным уласнікам нетраў краіны.

СМІ таксама паведамлялі, што Кіеў прызнаў доўг за ваенную амерыканскую дапамогу ў суме 100 млрд долараў: прыбыткі ад распрацоўкі нетраў будуць паступаць у нейкі фонд, з якога запазычанасць і будзе гасіцца.

Эксперты лічаць, што гэта зойме дзясяткі, калі не сотні гадоў, на працягу якіх Украіна распараджацца сваімі нетрамі не зможа.