У Магілёве медустановы працуюць у штатным рэжыме, праводзіцца кантроль за якасцю пітной вады

Сістэма аховы здароўя Магілёва працягвае працаваць у штатным рэжыме. Патокі пацыентаў, якім патрэбны рэнтгендаследаванні, перанакіраваныя ў іншыя медустановы горада, паведамілі ў Міністэрстве аховы здароўя.

Праводзіцца лабараторны кантроль за якасцю пітной вады. Работы па ўхіленні наступстваў разгулу стыхіі працягваюцца.

Дагэтуль магіляўчане спраўляюцца з наступствамі непагадзі. Хтосьці вызваляе платы, якія заваліла дрэвам, хтосьці расчышчае абочыны. Згуртаваліся і жыхары, і камунальныя службы. Паводле слоў магіляўчан, адбылося ўсё гэта літаральна за паўгадзіны, пасля чаго вецер і бура сціхлі.

Штармавы вецер прывёў да шматлікіх завалаў, якія ў сваю чаргу абцяжарваюць доступ да аб'ектаў. Энергетыкі сумесна з камунальнымі службамі, МНС, супрацоўнікамі лясгасаў расчышчаюць дарогі. Рабочыя калектывы, школьнікі, студэнты - магіляўчане дапамагаюць наводзіць парадак у горадзе пасля ўрагану.

На 11 ліпеня ў Беларусі аб'яўлены аранжавы ўзровень небяспекі. На большай частцы краіны зноў чакаюцца навальніцы, месцамі моцныя ліўні, шквалістае ўзмацненне ветру таксама да 24 м/с, як напярэдадні было ў Магілёве, месцамі град, папярэджваюць сіноптыкі.