Вярблюды, ламы і страусы. Больш як 100 жывёл пасяліліся ва ўнікальным заапарку пад Маладзечнам

Аазіс клопату і бяспекі. Пад Маладзечнам ў міні-заапарку пасяліліся больш за сотню жывёл. Гаспадары аграсядзібы даюць прытулак немаладым жывёлам, якія маюць праблемы са здароўем і засталіся без жылля. Сярод насельнікаў - коні, вярблюды, ламы, страусы, чаплі і буслы. Турысты з розных куткоў Беларусі з задавальненнем наведваюць сядзібу.

Сямейная справа Чарняўскіх пачалася з дзіцячай мары Анастасіі – мець хатняга гадаванца – менавіта жвавага скакуна. Гэта наіўнае жаданне прывяло да адкрыцця ўнікальнага экацэнтра, дзе жывёлы - невыпадковыя суседзі. У кожнай свой лёс.

Аазіс клопату і бяспекі існуе ў Маладзечанскім раёне 8 гадоў. Заасям'я павялічваецца пакрысе. Спачатку з'явілася жарабя па мянушцы Ласка. А сёння тут як мінімум 100 насельнікаў з розных куткоў Беларусі, якія знайшлі ўтульны дом.

Так і з'явілася аграсядзіба, а затым фермерская гаспадарка. Муж Анастасіі - Юрый - надзейны памочнік. Шматдзетныя бацькі трох дачок нядаўна сталі бабуляй і дзядулем.

Да размовы павольна далучаецца Маруся. Адразу і не скажаш, што жывёліна ў гадах. Сярэбраны ўзрост і мудрасць у вачах. Сівая прыгажуня адолела сурьёзнае захворванне і цяпер сама атуляе клопатам слабых насельнікаў аграсядзібы. Зараз узяла апеку над былой артысткай Пскоўскага цырка.

Бадай, самыя экзатычныя жыхары тут - вярблюды, ёсць ламы, страусы, чаплі і буслы. Маладзенькія скакуны з памяркоўным характарам дапамагаюць у рэабілітацыі дзяцей праз заняткі іпатэрапіяй і майстар-класы па доглядзе за жывёламі.

Зараз у Чарняўскіх 30 гектараў зямлі. З развіццём сямейнай справы патрэбны і дадатковыя плошчы пад цёплыя і прасторныя стайні, лявады, палі для вырошчвання кармоў.