Беларуска Ганна Дамарацкая заваявала золата Кубка наймацнейшых канькабежцаў на тысячы метраў

Беларуска Ганна Дамарацкая атрымала перамогу на Кубку наймацнейшых спартсменаў па канькабежным спорце на "Мінск-Арэне", паведамляе БЕЛТА.

Спаборніцкую праграму другога дня турніру адкрылі забегі на дыстанцыі 1000 м у жанчын, на старт выйшлі 3 прадстаўніцы Беларусі і 7 расіянак. Уладальніцай золата стала лідар нашай спрынтарскай каманды Ганна Дамарацкая, якая паказала вынік 1 мін. 16,96 сек. Серабро і бронзу выйгралі Ірына Кузняцова і Аляксандра Краўчанка з Расіі, якія саступілі Ганне больш за паўтары секунды. Яшчэ адна беларуска Кацярына Гагіева заняла 4 месца, фаварыт на гэтай дыстанцыі расіянка Дар'я Качанава ўпала на адным з віражоў і не здолела завяршыць забег.

Сённяшні медаль стаў для Дамарацкай трэцім на хатнім турніры пасля серабра на 500-метроўцы і золата ў камандным спрынце. У чацвер наймацнейшых на тысячы метраў вызначаць мужчыны, таксама 27 лютага вызначацца прызёры ў камандных гонках.