Беларускія біятланісты Сола і Бялько сталі трэцімі ў сінгл-міксце на першым этапе Кубка Расіі

Беларускія біятланісты сталі прызёрамі адзіночнай змяшанай эстафеты, якая ў суботу, 30 лістапада, прадоўжыла праграму стартавага этапу Кубка Расіі ў Ханты-Мансійску, паведамляе  БЕЛТА.

Удзел у сінгл-міксце ўзялі 19 дуэтаў з розных рэгіёнаў Расіі, а таксама дзве пары з нашай зборнай. За каманду Беларусь-1 беглі Ганна Сола і Павел Бялько, каманду Беларусь-2 прадставілі Ганна Песцерава і Мікіта Лобастаў. Пасля паловы гонкі наш асноўны склад замыкаў топ-3, на трэцім этапе Сола падняла дуэт на радок вышэй. На чацвёртым адрэзку дыстанцыі Бялько на некаторы час выпаў з ліку лідараў, але на апошніх метрах дыстанцыі адыграў адставанне і фінішаваў трэцім.

Песцерава і Лобастаў у выніку паказалі трынаццаты вынік. Перамогу ў гонцы атрымалі Тамара Дзербушава і Кірыл Бажин (Свярдлоўская вобласць-1), другімі сталі Крысціна Паўлушына і Аляксей Зубараў (Маскоўская вобласць-3).

Раней на першым этапе Кубка Расіі адбыліся спрынтарскія гонкі, уладальнікамі бронзавых узнагарод у якіх сталі Антон і Дзінара Смольскія. Праграму спаборніцтваў у Ханты-Мансійску 1 снежня  завершыць класічная змяшаная эстафета, пачатак а 10-й гадзіне па мінскім часе.