Чацвёра беларусаў выступяць на зімовай Паралімпіядзе-2026

Усё менш часу застаецца да старту зімовых Паралімпійскіх гульняў, якія пройдуць у італьянскіх Мілане і Карціна-д'Ампеца з удзелам беларусаў.

Нашы спартсмены будуць змагацца за медалі ў лыжных гонках і выступяць з усёй дзяржсімволікай. А гэта значыць, у выпадку перамогі мы пачуем на гульнях беларускі гімн і ўбачым наш флаг.

Ліцэнзіі, нагадаем, атрымалі 4 спартсмены. Гэта тытулаваныя Лідзія Лобан і Валянціна Бірыла (у дзявоцтве - Шыц), Дар'я Фядзьковіч, а таксама пераможца і прызёр нядаўняга Кубка свету Раман Свірыдзенка.

Гэтымі днямі наша каманда знаходзіцца на трэніровачным зборы ў аўстрыйскім Зефельдзе. Паралімпійцы працягваюць падрыхтоўку да Гульняў пад кіраўніцтвам трох трэнераў: Антона Румянцава, Юрыя Буранава і Мікалая Шаблоўскага. Збор прадоўжыцца да канца лютага, а ўжо 1 сакавіка беларускія паралімпійцы плануюць засяліцца ў вёску спартсменаў.

Цырымонія адкрыцця Паралімпійскіх гульняў пройдзе 6 сакавіка. Першыя старты з удзелам беларусаў вызначаны на 9 сакавіка.