Два беларусы сталі прызёрамі мас-старту на этапе Кубка Садружнасці па біятлоне ў Чайкоўскім

Антон Смольскі і Дзмітрый Лазоўскі сталі прызёрамі гонкі з масавым стартам на трэцім этапе Кубка Садружнасці па біятлоне ў Чайкоўскім, паведамляе БЕЛТА.

Удзел у гонцы на 15 км прынялі 30 наймацнейшых спартсменаў. Да заключнага агнявога рубяжа сярод пяці лідараў падышлі адразу тры беларусы - Антон Смольскі, Дзмітрый Лазоўскі і Максім Варабей.

Смольскі і Варабей дапусцілі па адным промаху, а Лазоўскі адстраляўся чыста і пабег  на дыстанцыю першым разам з расіянінам Мікітам Поршневым. На заключным крузе Лазоўскі адстаў ад Поршнева і да таго ж прапусціў наперад партнёра па камандзе Смольскага. У выніку Антон фінішаваў другім, Дзмітрый - трэцім.

Максім Варабей замкнуў шасцёрку наймацнейшых, яшчэ два беларусы - Мікіта Лобастаў і Павел Бялько - паказалі 14-ты і 18-ты вынікі адпаведна.

Агульны залік Кубка Садружнасці сярод мужчын пасля трох этапаў працягвае ўзначальваць Антон Смольскі, на рахунку якога 935 ачкоў. Таксама ў дзясятцы лепшых Дзмітрый Лазоўскі.