У Палаце прадстаўнікоў прайшло ўшанаванне прызёраў Алімпійскіх і Паралімпійскіх гульняў у Парыжы

Актуальныя пытанні развіцця спорту вышэйшых дасягненняў абмеркавалі 14 кастрычніка ў Палаце прадстаўнікоў Нацыянальнага сходу Беларусі. Акрамя таго, гучалі і словы падзякі нашым атлетам.

Старшыня заканадаўчага органа Ігар Сергеенка асабіста павіншаваў чэмпіёнаў, прызёраў, іх трэнераў з выдатным выступленнем на XXXIII летніх Алімпійскіх гульнях і XVII летняй Паралімпіядзе ў Парыжы, уручыўшы адпаведную падзяку.

У сталіцы Францыі, нагадаем, Іван Літвіновіч выйграў золата, стаўшы двухразовым алімпійскім чэмпіёнам па скачках на батуце. Віялета Бардзілоўская ў гэтай жа дысцыпліне стала другой, як і Яўген Залатой у веславанні акадэмічным. Цяжкаатлет Яўген Ціханцоў заваяваў бронзу.

Нашы паралімпійцы таксама гучна заявілі пра сябе, заваяваўшы 7 узнагарод, 6 з якіх залатыя. Пры гэтым у Парыжы беларусы былі вымушаны выступаць у нейтральным статусе. Але нягледзячы ні на што, яны ўсё роўна адчувалі падтрымку радзімы, падкрэслілі самі атлеты.

Удзельнікі мерапрыемства не толькі ўспомнілі яркія трыумфы. Падчас сустрэчы таксама закранулі і пытанні заканадаўчага забеспячэння дзейнасці ў сферы спорту.