Беларускія медыкі прайшлі стажыроўку ў Кітаі

Беларусь і Кітай умацоўваюць партнёрства па лініі аховы здароўя. У рамках сумесных праектаў краін ШАС дэлегацыя нашых урачоў прайшла стажыроўку ў горадзе Шыхэцзы.

На працягу трох тыдняў медыкі наведвалі вядучыя ВНУ, фармкампаніі і аб'екты аховы здароўя Паднябеснай. Кітайскі бок выказаў зацікаўленасць у пашырэнні супрацоўніцтва з установамі аховы здароўя Беларусі, а таксама з медуніверсітэтамі ў галіне сумеснай падрыхтоўкі спецыялістаў.

Зараз у нашых медыцынскіх ВНУ навучаецца 55 студэнтаў з КНР, лічба будзе расці.

Беларусь у статусе паўнапраўнага члена ШАС знаходзіцца ўжо больш за год. Беларускія ідэі, якія прапаноўваліся раней, ужо атрымалі міжнародную падтрымку. Не толькі ў ахове здароўя, але і ў сферах трансферу тэхналогій, інфармацыйнай бяспекі, транспарту і лагістыкі, прамысловасці, гандлю і інвестыцый.