Дзяржпагранкамітэт: у памежжы з Літвой канфіскаваны беспілотнік

У памежжы з Літвой канфіскаваны беспілотнік. Аб гэтым паведамляе БЕЛТА са спасылкай на Дзяржпагранкамітэт.

Лідскія пагранічнікі 10 сакавіка ў раёне н.п. Гайцюнішкі Вораноўскага раёна Гродзенскай вобласці, які размешчаны за некалькі кіламетраў ад літоўскай мяжы, у выніку рэалізацыі аператыўнай інфармацыі затрымалі мясцовага жыхара. Пры сабе ў мужчыны выяўлены беспілотны лятальны апарат саматужнай вытворчасці з двума акумулятарамі.

Беспілотнік і камплектуючыя канфіскаваны. Яны дастаўлены ва ўпраўленне Лідскага памежнага атрада. У дачыненні затрыманага пачаты адміністрацыйны працэс па ч. 1 арт. 24.19 КаАП Рэспублікі Беларусь (парушэнне памежнага рэжыму).

У ДПК нагадваюць, што забараняецца ўвоз, захоўванне, абарачэнне, эксплуатацыя і выраб беспілотнікаў і выкарыстанне паветранай прасторы Рэспублікі Беларусь без належнага дазволу.

Акрамя таго, незаконнае ўтрыманне і выкарыстанне беспілотнікаў у памежнай зоне альбо памежнай паласе з'яўляюцца парушэннем памежнага рэжыму і вядуць да адміністрацыйнай адказнасці паводле артыкула 24.19 КаАП (штраф да 50 базавых велічынь).