У Мінскай вобласці адна іскра стала прычынай маштабнага пажару. Даведаліся падрабязнасці

Адна іскра можа стаць прычынай вялікага агню. З-за стыхійных узгаранняў у экасістэмах у асаблівым рэжыме зараз працуюць байцы МНС. Так, у Валожынскім раёне з-за засухі гарэў участак ворнага поля. Агонь перакінуўся на жылыя будынкі. Зафіксаваны ўзгаранні расліннасці ў Клецкім раёне і тарфянікаў у Салігорскім. Спецыялісты аператыўна тушаць і праводзяць маніторынг асабліва гарачых участкаў.

Адна іскра можа стаць прычынай вялізнага пажару. Так адбылося ў Валожынскім раёне Мінскай вобласці. 36 гектараў ворнага поля знішчаны агнём за некалькі гадзін. Прычына такіх пажараў - сухое надвор'е, моцны вецер і неасцярожнасць чалавека.

Полымя ўспыхнула раптоўна, агонь імгненна перамясціўся на бліжэйшую вёску Буні. Загарэўся нежылы дом, а пасля гаспадарчыя пабудовы на суседнім участку. Падраздзяленні МНС з Валожына і Гродзенскай вобласці прыбылі на месца аператыўна, лакалізавалі пажар.

Ад будынкаў засталіся толькі абвугленыя каркасы. Агонь знішчыў дрэва імгненна. На шчасце, ніхто не пацярпеў.

Дакладную прычыну надзвычайнай сітуацыі зараз высвятляюць. Але МНС нагадвае, што цяпер спальваць леташнюю траву на прыдамавых тэрыторыях у прыватным сектары асабліва небяспечна. Вецер дапамагае распаўсюдзіцца полымю імгненна. Таму лепш адкрыты агонь на участках не разводзіць.

За ўзгараннямі на карце краіны і Мінскай вобласці МНС сочыць з дапамогай спадарожнікаў, якія даюць звесткі аб крытычным павышэнні тэмпературы на пажаранебяспечных участках. У дапамогу спецыялісты Мінлясгаса. Яны таксама праводзяць рэгулярны маніторынг і абыходы ляснога фонду.

Толькі за 2025 год у цэнтральным рэгіёне ўжо адбылося 380 узгаранняў сухой травы. МНС працуе ў асаблівым рэжыме павышанай гатоўнасці, каб выехаць на месца і своечасова лакалізаваць пажар. Жыхароў прыватнага сектара просяць у гэты перыяд быць асабліва асцярожнымі з агнём.