"Дынама-Мінск" зноў чэмпіён Беларусі - апошнія навіны спорту раскажам у рубрыцы "Матчбол"

Выдатна выступілі беларусы на першым у зімовым сезоне Кубку Расіі па біятлоне. Напярэдадні наша каманда перамагла ў змяшанай эстафеце, а дагэтуль былі яшчэ тры бронзавыя медалі. У пятніцу стартуе другі этап спаборніцтваў, які таксама пройдзе ў Ханты-Мансійску. А ў рубрыцы "Матчбол" сёння ўся ўвага гульнявым відам спорту.

Мінскае "Дынама" - чэмпіён Беларусі, другі год запар каманда перамагае ў першынстве краіны і дзявяты раз ў гісторыі. Вырашальнай, сімвалічна, стала гульня супраць БАТЭ.

Барысаўчане завіталі ў госці да "Дынама" ў якасці аўтсайдэра, аднак, змагаліся доўга на роўных - у выніку ўсё вырашыць адзін дакладны ўдар Вадзіма Пігаса, дарэчы, выхаванца БАТЭ. Гол атрымаўся залатым - 1:0. Перамаглі мінчане і датэрмінова заваявалі золата чэмпіянату.

Аднак святкаваць вікторыю дынамаўцам часу не было, ужо ў чацвер каманда прадоўжыла выступленне ў асноўным раўндзе Лігі канферэнцый. У Азербайджане, дзе мінчане праводзяць хатнія матчы - беларусы прымалі дацкі "Капенгаген". На жаль, бела-сінія саступілі - 1:2, з-за чаго амаль страцілі ўсе шанцы на выхад у плэй-оф. Наперадзе "Дынама" чакаюць гульні супраць "Ларна" і "Панатынаікоса".

А вяртаючыся да чэмпіянату краіны, канстатуем: сярэбраныя медалі першынства Беларусі ў гэтым сезоне зноў у "Нёмана", бронза - у жодзінскага "Тарпеда". Вызначым і чацвёртае месца па выніках сезона - "Дынама-Брэст".

"Дынама-Маладзечна" - лідар пасля першай паловы рэгулярнага сезона Экстралігі. Магчымасцю абысці "зуброў" не скарысталася ў аўторак сталічнае "Юнацтва". На "Чыжоўка-Арэне" мядзведзі прымалі салігорскі "Шахцёр", і ўпершыню ў сезоне мінчане пакінулі дамашні лёд без закінутых шайб. У выніку ўсё вырашыў адзін дакладны кідок у выкананні Ігара Рудэнкі, які ён нанёс у сярэдзіне першага перыяду. 1:0 "Шахцёр" перамагае, у галкіпера салігарчан - Аляксея Снытко - 37 сэйваў.

А ў пятніцу ўжо стартаваў другі круг хакейнага першынства краіны - і "Дынама-Маладзечна" стартуе і тут з перамогі - 1:0. "Зубры" мацнейшыя за "Магілёў". Сёння каманды згуляюць зноў. На адзін бал да "Дынама" адстае сталічнае "Юнацтва" - у сваім першым матчы другога круга мінчане саступілі "Віцебску" - 1:4, аднак напярэдадні ўзялі рэванш у каманды Рамана Юпатава з такім жа лікам!

На гэтым тыдні сочым за хакеем. Вашай увазе - гульні КХЛ, МХЛ і айчыннай Экстралігі. Паралельна цікавімся гандболам - гульнямі СЕХА-Лігі. А 6 снежня стартуе другі этап Кубка Рассіі па біятлоне! Усё гэта, зразумела Вас чакае на телеканалах Белтэлерадыёкампаніі: любіце спорт і мы абавязкова яшчэ ўбачымся.