Каманда МУС выйграла біятлонную эстафету на "Мінскай лыжні" ў Раўбічах

На базе Рэспубліканскага цэнтра алімпійскай падрыхтоўкі па зімовых відах спорту "Раўбічы" стартавала штогадовае спартыўна-масавае мерапрыемства "Мінская лыжня", паведамляе БЕЛТА.

Спаборніцкую праграму спартыўнага свята адкрыла біятлонная эстафетная гонка сярод каманд цэнтральных апаратаў сілавых міністэрстваў і ведамстваў. Кожны з чатырох членаў каманды прабег па два кругі (1000 м для жанчын і 1200 м у мужчын) з заходам на два агнявыя рубяжы.

Перамогу ў гонцы атрымаў квартэт МУС, за які на апошнім этапе бег першы намеснік міністра ўнутраных спраў - начальнік міліцыі грамадскай бяспекі Юрый Назаранка. Другое месца заняла чацвёрка Следчага камітэта, тройку прызёраў замкнула каманда Міністэрства па надзвычайных сітуацыях. Чацвёрты вынік паказаў квартэт Міністэрства абароны, за які фінішаваў міністр абароны Віктар Хрэнін.

Далей на старт эстафетных гонак выйдуць каманды рэспубліканскіх органаў дзяржаўнага кіравання, прадстаўнікі працоўных калектываў арганізацый, а таксама супрацоўнікі і студэнты вышэйшых навучальных устаноў. Напрыканцы мерапрыемства адбудзецца мас-старт з удзелам 300 аматараў спорту.