Сасновіч прабілася ў асноўную сетку турніру WTA-250 у Нотынгеме

Тэнісістка з Беларусі Аляксандра Сасновіч змагла выйсці ў асноўную сетку турніру катэгорыі WTA-250 у Нотынгеме (Вялікабрытанія). Прызавы фонд турніру складае 275 тыс. долараў, піша БЕЛТА.

У першым раўндзе кваліфікацыі беларуска адолела ў трохсэтавым паядынку аўстралійку Маю Джойнт - 3:6, 6:4, 6:1, потым перайграла ў дзвюх партыях прадстаўніцу Іспаніі Крысціну Букшу - 6:3, 6:4. У стартавым матчы асноўнага этапу саперніцай Аляксандры Сасновіч будзе кітайская тэнісістка Лінь Чжу.

Першая ракетка планеты беларуска Арына Сабаленка на гэтым тыдні прыме ўдзел у турніры WTA-500 у Берліне з прызавым фондам 1 млн долараў. Сабаленка стартуе з другога раўнда, дзе сустрэнецца з пераможцам матча 1/16 фіналу паміж амерыканскай тэнісісткай Сафіяй Кенін і Рэбекай Масаравай са Швейцарыі.

Спаборніцтвы на травяных кортах Нотынгема і Берліна завершацца 22 чэрвеня.