24 мая адзначаецца Дзень славянскага пісьменства і культуры

24 мая ўсе славянскія народы, якія карыстаюцца кірылічным алфавітам, адзначаюць Дзень славянскага пісьменства. У Беларусі яго святкуюць з 1986 года і называюць Днём славянскага пісьменства і культуры, паведамляе БЕЛТА.

Дата 24 мая выбрана не выпадкова - у гэты дзень праваслаўная царква ўшаноўвае святых роўнаапостальных Мяфодзія і Кірыла, асветнікаў і прапаведнікаў хрысціянства. Святыя Кірыл і Мяфодзій склалі славянскую азбуку, пераклалі з грэчаскай на славянскую мову некалькі богаслужэбных кніг, у тым ліку абраныя чытанні з Евангелля, апостальскія пасланні і Псалтыр, што спрыяла ўвядзенню і распаўсюджванню славянскага богаслужэння.

У Мінску штогод праводзяцца Міжнародныя Кірыла-Мяфодзіеўскія чытанні. У 2025 годзе яны прайшлі 13-16 мая.

Да ўдзелу ў чытаннях былі запрошаны прадстаўнікі навуковай і культурнай грамадскасці, кіраўнікі адукацыйных устаноў, выкладчыкі, аспіранты і студэнты дзяржаўных і царкоўных устаноў адукацыі, прадстаўнікі духавенства.

Штогадовыя Кірыла-Мяфодзіеўскія чытанні з'яўляюцца форумам, які ўжо больш чым 30 гадоў аб'ядноўвае спецыялістаў і навукоўцаў з краін блізкага і далёкага замежжа, што працуюць у галіне багаслоўя, гісторыі, філасофіі, культуралогіі і рэлігіязнаўства.