82-я гадавіна з дня трагедыі ў Хатыні - на мемарыяле ўскладаюць кветкі

22 сакавіка ў мемарыяльным комплексе "Хатынь" праходзяць мерапрыемствы, прысвечаныя 82-й гадавіне з дня трагедыі беларускай вёскі. Пачаліся яны літургіяй і памінальнай ліціяй у храме ў гонар Нараджэння Прасвятой Багародзіцы, паведамляе БЕЛТА.

У дзень памяці беларускай вёскі, спаленай карнікамі 82 гады таму, 22 сакавіка 1943 года, разам з яе 149 жыхарамі, сярод якіх было 75 дзяцей, на мемарыяле, які быў адкрты ў 1969 годзе, з самай раніцы праходзіць народнае ўскладанне кветак.

У Хатынь, што стала сімвалам памяці і смутку, едуць усе, хто жадае аддаць даніну павагі продкам, якія загінулі, але не пакарыліся. Прайсці, схіліўшы галаву, па яе брукаваных дарожках, застыць пад метраном званоў у хвіліне маўчання, каб зноў задумацца аб нетрываласці міру на зямлі.

Першым да Вечнага агню лёг вянок ад Прэзідэнта Рэспублікі Беларусь як сімвал таго, што ўся краіна сёння смуткуе, успамінаючы жыхароў Хатыні, а таксама жыхароў беларускіх вёсак, якія раздзялілі яе лёс. Такіх населеных пунктаў 288, часткова або поўнасцю знішчаных - больш за 12 тыс.

Букеты з руж і гваздзікоў да Вечнага агню і фігуры Непакоранага чалавека ўскладаюць асобы, якія займаюць вышэйшыя дзяржаўныя пасады, прадстаўнікі міністэрстваў і ведамстваў, грамадскіх арганізацый, дэлегацыі абласцей, моладзь. Сёння ў Хатыні шмат беларускіх сем'яў, гасцей з Расіі і краін СНД.