Даведаліся, як Брэст рыхтуецца адсвяткаваць 80-годдзе Перамогі

23 красавіка ў Брэсце распавялі, як маштабна збіраюцца адсвяткаваць 9 Мая. Галоўныя падзеі - Парад Перамогі на плошчы Леніна і святочнае шэсце - горад далучыцца да рэспубліканскай акцыі "Беларусь памятае. Памятаем кожнага".

Традыцыйна ў Брэсцкай крэпасці пройдзе мітынг і ўскладанне кветак да Вечнага агню. І новыя праекты: "Вальс Перамогі" станцуюць на чыгуначным вакзале, а на пешаходнай вуліцы Савецкай можна будзе ўбачыць "Застылую памяць" - яе перададуць удзельнікі тэатра жывых скульптур. Плюс маштабныя выставы, канцэрты і грандыёзны салют увечары. Удзельнікамі мерапрыемстваў стануць не толькі брэстаўчане, але і замежныя госці. Пра свой удзел заявілі дэлегацыі з Латвіі, Славакіі, Германіі, рэгіёнаў Расіі.

Яшчэ адно маштабнае мерапрыемства з удзелам Нацыянальнага акадэмічнага Вялікага тэатра оперы і балета Беларусі - "Патэтычны дзённік памяці"- пройдзе 1 мая ў Брэсцкай крэпасці. Праект адлюстроўвае ўвесь боль і жах вайны, якія прыйшлося перажыць нашаму народу. А з 30 красавіка па 11 мая Брэсцкая крэпасць стане знакавым пунктам на шляху мноства аўтапрабегаў.