Пуцін перадаў Талаю савецкія манеты для стварэння помніка на Паклоннай гары

Прэзідэнт Расіі Уладзімір Пуцін перадаў беларускаму грамадскаму дзеячу, паралімпійцу Аляксею Талаю манеты для стварэння помніка на Паклоннай гары ў Маскве, прымеркаванага да 80-й гадавіны Перамогі ў Вялікай Айчыннай вайне. Ад імя кіраўніка расійскай дзяржавы іх уручыў прэс-сакратар прэзідэнта РФ Дзмітрый Пяскоў, адпаведны відэазапіс размешчаны ў Telegram-канале Крамля, паведамляе БЕЛТА.

Дзмітрый Пяскоў паведаміў, што гэта савецкія манеты, якія захоўваліся ў сям'і Уладзіміра Пуціна. "І папрасіў абавязкова вам гэта перадаць, таму што, па-першае, такія намаганні ў год 80-годдзя Перамогі для нас для ўсіх - гэта тое, што вельмі цяжка пераацаніць", - сказаў прэс-сакратар на сустрэчы з Аляксеем Талаем.

Дзмітрый Пяскоў назваў цудоўнай работу Аляксея Талая па стварэнні помніка, адзначыўшы, што яна з'яўляецца павучальнай для маладога пакалення.

Праект "Жывая памяць удзячных пакаленняў" рэалізуецца па ініцыятыве дабрачыннага фонду Аляксея Талая. У яго рамках першы помнік усталяваны ў Мінску 2 ліпеня 2022 года, другі - 28 ліпеня 2024 года ў Брэсце. Трэці помнік плануецца да ўстаноўкі ў Маскве да 80-годдзя Перамогі ў Вялікай Айчыннай вайне.