Сапраўды народная: спаўняецца 105 гадоў з дня нараджэння легенды Купалаўскага Галіны Макаравай

27 снежня спаўняецца 105 гадоў з дня нараджэння савецкай і беларускай актрысы тэатра і кіно Галіны Макаравай. Пра гэта паведамляе БЕЛТА.

Галіна Кліменцьеўна Макарава (сапраўднае імя - Агата Чаховіч) нарадзілася 27 снежня 1919 года ў гарадскім пасёлку Старобін Салігорскага раёна. Яе бацьку рэпрэсіравалі. Чаховічы знішчылі ўсе дакументы, звязаныя з імем галавы сям’і. Сапраўднай даты свайго нараджэння Галіна Кліменцьеўна не ведала, бо ў новым пашпарце год нараджэння ёй напісалі няправільна, але пазней яна вылічыла, што нарадзілася ў 1916 годзе.

У 16 гадоў Агата пераехала ў Мінск, дзе працавала хатняй работніцай, санітаркай у 1-й клінічнай бальніцы. Пазней бацька сяброўкі дапамог ёй паступіць у студыю Першага Беларускага драматычнага тэатра (цяпер Нацыянальны акадэмічны тэатр імя Янкі Купалы), якую яна скончыла ў 1938 годзе. У гэтым жа годзе яна была прынятая ў трупу тэатра, але пад прозвішчам маці. Таксама яна ўзяла "псеўданім", з Агаты ператварыўшыся ў Галіну.

У тэатры вядомасць да Макаравай прыйшла не адразу. Спачатку яна іграла ў асноўным эпізадычныя ролі. Зорны час здарыўся, калі Андрэй Макаёнак напісаў спецыяльна для яе "Лявоніху на арбіце". Актрыса 600 разоў іграла Лушку ў гэтым спектаклі.

На сцэне Купалаўскага тэатра Макарава ўвасобіла больш чым 60 роляў. Яна стварыла галерэю каларытных вобразаў беларускіх жанчын: стрыманых і мяцежных, пакорлівых і непадуладных жыццёвым бурам, напоўненых тонкімі трагічнымі і лірычнымі перажываннямі. У Купалаўскім актрыса служыла да апошніх дзён.

Кінаслава прыйшла да яе ў 1976 годзе, калі на экраны выйшаў фільм Сяргея Мікаэляна "Удовы". Роля Аляксандры Мацвееўны Громавай у кінадраме глыбока кранула сэрцы мільёнаў тэлегледачоў. Галіне Макаравай тады было 57 гадоў.

Потым былі карціны "Белыя росы", "Восеньскія сны", "Белыя адзенні", "Плач перапёлкі", "Дзіўныя прыгоды Дзяніса Караблёва", "Развітанне славянкі" і іншыя. Акрамя мастацкіх фільмаў, яна здымалася і ў тэлевізійных пастаноўках: "Завеі, снежань" (роля мачахі Ганны) і іншых. У 1983 годзе пра Галіну Макараву быў зняты дакументальны фільм "Каралеў я не іграла", а ў 2009 годзе выйшаў мастацка-публіцыстычны фільм "Мама".

У 1967 годзе Макарава атрымала званне народнай артысткі Беларусі, а ў 1980 годзе - народнай артысткі СССР.

Памерла Галіна Кліменцьеўна на сваёй дачы пад Мінскам вераснёвым днём 1993 года.

Пахавана ў беларускай сталіцы на Усходніх могілках. На радзіме актрысы, у Старобіне, адна з вуліц названая ў яе гонар.