У Мінску ўвялі абмежаванні для шэрынгавых самакатаў. Раскажам, што змянілася

У Мінску ўвялі новыя абмежаванні для аператараў электрасамакатаў. Перагледжана ранейшая мяжа максімальнай хуткасці 25 км/г.

З гэтага часу ў межах першага гарадскога транспартнага кальца для мабільнага транспарту хуткаснае абмежаванне вызначаецца 15 км/г, у межах другога - 17 км/г, на астатняй тэрыторыі беларускай сталіцы - 20 км/г.

Дадаткова прадугледжаны ўчасткі вулічна-дарожнай сеткі, дзе ўводзіцца ліміт у 7 км/г. Іх стане ў чатыры разы больш, чым раней, а агульная колькасць дасягне 200. Таксама вызначаны тэрыторыі, дзе забаронены пачатак і заканчэнне арэнды, абмежаваны прыпынак і стаянка мабільнага транспарту.

Новыя абмежаванні накіраваны на тое, каб павысіць узровень бяспекі. За 2024 год колькасць ДТЗ з удзелам арэндных самакатаў у Мінску павялічылася ў чатыры разы.