У Віцебскім раёне выяўлены астанкі больш як 20 байцоў Чырвонай арміі

Астанкі больш чым 20 байцоў Чырвонай арміі выявілі пошукавікі побач з вёскай Кузьмянцы Віцебскага раёна.

У 1944-м тут праходзіў шлях 251-й стралковай дывізіі, якая змагалася за вызваленне Віцебска. Гэта быў адзін з самых напружаных участкаў фронту. Вялікія страты былі і ў савецкіх войскаў, і ў варожых.

Да падняцця астанкаў далучыліся гісторыкі, а таксама кадэты і школьнікі.

Павел Артамонаў, сапёр 52-га асобнага спецыялізаванага пошукавага батальёна УС Беларусі:

"Я гісторык па адукацыі, скончыў гістарычны факультэт БДУ. Тут у 1944 годзе стаяў фронт, кірунак на Віцебск. Спачатку тут была нямецкая лінія абароны, потым савецкая лінія абароны".

Сярод знаходак - асабістыя рэчы салдат і баявыя ўзнагароды: ордэн Чырвонай Зоркі і медаль "За адвагу", у якіх чытаюцца нумары. Пры іх дапамозе ёсць магчымасць знайсці сваякоў загінуўшых.