У Віцебску адбылося адкрыццё помніка "Дрэва жыцця"

У Віцебску на тэрыторыі мемарыяла "5-ты полк" урачыста адкрылі помнік "Дрэва жыцця". Гэта чарговае пацвярджэнне таму, што беларусы не забываюцца, як акупанты і іх памагатыя забівалі і мучылі мірных жыхароў, занявольвалі жанчын і дзяцей.

Яшчэ ў 2024 годзе Міністэрства культуры Рэспублікі Беларусь пры падтрымцы Генеральнай пракуратуры Беларусі абвясціла конкурс эскізных праектаў манумента. Перамог аўтарскі калектыў скульптара Івана Казака і архітэктара Валерыя Рыбакова.

У гады Вялікай Айчыннай вайны на ўскраіне Віцебска фашысты стварылі перасыльны лагер для савецкіх ваеннапалонных, а пазней сюды сталі звозіць і мірных жыхароў. Ад голаду і катаў толькі тут загінулі больш як 80 тыс. чалавек. У памяць пра іх і стварылі мемарыял "5-ты полк", а 14 мая 2025 года тут адкрылі новую кампазіцыю.

Памятны знак сімвалізуе нясхільнасць духу беларускага народа падчас нацысцкага генацыду і імкненне да мірнага і незалежнага жыцця. Рукі забітых мужчын і жанчын, дзяцей і старых, якія цягнуцца з зямлі да неба, пераплятаюцца разам, фарміруючы вобраз дрэва як сімвал вечнага жыцця, нягледзячы на планы ворага.

Адкрыццё манумента "Дрэва жыцця" - яшчэ адзін крок да захавання гістарычнай памяці і ўпэўненая заява: свет павінен даведацца пра ўсіх вінаватых у генацыдзе беларускага народа.